ജിദ്ദ: സുഖ-ദുഖ സമ്മിശ്രമായ മനുഷ്യ ജീവിതത്തിലെ ഇരു അവസ്ഥകളും ദൈവീക പരീക്ഷണങ്ങളാണെന്ന തിരിച്ചറിവോടെ ഉത്തരവാദിത്ത നിര്‍വ്വഹണത്തില്‍ വീഴ്ചകള്‍ സംഭവിച്ച് പോകാതെ അവ രണ്ടും ദൈവീക പ്രീതിക്ക് നിമിത്തങ്ങളായി മാറ്റാന്‍ വിശ്വാസികള്‍ ശ്രദ്ധിക്കണമെന്ന ജിദ്ദാ ഇന്ത്യന്‍ ഇസ്ലാഹി സെന്റര്‍ പ്രബോധകന്‍ മോയിന്‍ കുട്ടി മദനി അഭിപ്രായപ്പെട്ടു. സെന്റര്‍ ഓഡിറ്റോറിയത്തില്‍ കാലപ്പകര്‍ച്ചകള്‍ നമുക്ക് നല്‍കുന്ന സന്ദേശം എന്ന വിഷയം അവതരിപ്പിച്ച് സംസാരിക്കുകയായിരുന്നു അദ്ദേഹം. പരിഭ്രമജനകമായ കാലത്തിന്റെ ഗതിവേഗത അന്ത്യത്തിലേക്കുള്ള മനുഷ്യന്റെ യാത്രയെ ത്വരിതപ്പെടുത്തുകയാണ്. ആയുസ്സിന്റെ നല്ലൊരുഭാഗം ഉറങ്ങിയും കളിച്ചും വാര്‍ദ്ധക്യത്തിന്റെ ആലസ്യത്തിലും കഴിച്ചുകൂട്ടുന്ന മനുഷ്യന് അനന്തമായ പാരത്രികമോക്ഷത്തന് വേണ്ടി പ്രവര്‍ത്തിക്കാന്‍ കിട്ടുന്ന സമയം പരിമിതമാണ്.